mp

21.9.05

Seddqu Talbkom, Qawwu Qalbkom

(B'apoloġija lill-Partit Laburista)
Minħabba li ma mmurx il-mass meetings ta' Lawrence Gonzi se noqgħod fuq ir-rapporti mxandra mill-mezzi tax-xandir. Upbeat bħas-soltu, Gonzi ta messaġġ ċar u skjett lill-poplu Malti: kunu kuraġġużi, il-bidla qiegħda sseħħ.
Tkunux ħnieżer - l-elezzjoni fadlilha sentejn u nofs oħra!
Skond id-di-ve, il-PM appellalna biex ma nkunux egoisti, anzi għandna nkunu paċenzjużi u, aktar minhekk, għandna nkunu lesti nagħmlu s-sagrifiċċji kollha meħtieġa fl-interess nazzjonali. L-injoranza tiegħi qiegħda tgħidli li għandi ninterpreta d-diskors tal-pm Gonzi bħala sejħa biex niskot, biex ma nibqax nikkritika, biex ma nibqax għassa li ma jitnaqqrux id-drittijiet tiegħi. Inkella nkun egoist, ħanżir, moħħni biss biex nara x'nista' nakkwista, x'nista' naqla'. Minflok, donnu li qiegħed jgħidli l-pm Gonzi, għandi nagħlaq ħalqi u nġib l-interess nazzjonali qabel l-interessi personali. Mhux talli hekk, talli qiegħed jgħidli wkoll li sa sentejn u nofs oħra Malta se tinbidel, se tibda taqta' l-ħsad tas-sagrifiċċju. Għala sa sentejn u nofs oħra jafuh biss l-istrateġisti nazzjonalisti. L-injoranza tiegħi tfakkarni li xi sentejn u nofs oħra jkollna elezzjoni ġenerali.
Tittradix lil Pajjiżek - għid 'iva' għall-korsa tal-golf, isa!
Imbagħad, il-pm Gonzi, dejjem skond id-di-ve, tana ċamata, daqqtejn fuq il-patata: Malta trid tiqba' pajjiż kompetittiv; trid, għaldaqstant, tibni żewġ koros tal-golf. L-injoranza tiegħi għadha ma waslitx biex tifhem x'inhi l-konnessjoni bejn il-kompetittivita' tal-pajjiż u t-toqob tal-golf. Forsi sa sentejn u nofs oħra nibda nifhem, imma għalissa għadni lura wisq. Allura, ejja ngħidu li, dawk kollha (u mhumiex ftit) li jopponu l-bini tal-koros tal-golf huma ħnieżer, jaraw biss l-interessi tagħhom, ma jafux x'inhuma l-ħtiġijiet ta' pajjiżhom, u li ħadd ħlief il-gvern nazzjonalista ma jifhem x'inhuma l-bżonnijiet ta' Malta. Wara kollox, anki Platun kien qal li r-Repubblika għandha titmexxa biss mill-illuminati. Il-karfa qiegħda hemm biex tieħu paċenzja. Parentesi dwar il-korsa tal-golf: il-portal nazzjonalista maltarightnow ma jinkludix il-kumment dwar il-korsa tal-golf. Forsi l-ġurnalist tad-di-ve sema' lill-pm jgħid dak li ma qalx, jew il-ġurnalist tal-mrn ma semax kollox. Biss, il-maltarightnow irrappurtat lill-pm li qal li l-gvern qed jaħdem bis-sħiħ favur l-ambjent għax "bil-ħarsien ta' l-ambjent niġbdu l-investiment f'pajjiżna (sic) u nsaħħu wkoll l-industrija importanti tat-turiżmu."
Il-Bidliet (mhux Gonzi-style)
Minkejja l-karattru tiegħi, għadni ma wasaltx biex nemmen li jien kapaċi niddefinixxi liema huma l-bidliet li jrid il-poplu Malti. Biss, għal darb'oħra l-injoranza tiegħi, tissuġġerili ftit bidliet li nittama li għad jaslu u nittama wkoll li ma jdumux:
1) Li ma nibqgħux ngħixu taħt diktati partiġġjani;
2) Li d-drittijiet li bnedmin oħra għandhom fil-kumplament ta' l-Ewropa - id-divorzju perżempju - ma jibqgħux miċħuda lili. Li ma jibqax jeżisti kredu kattoliku li jiddetta l-ħajja ta' min mhux kattoliku, sempliċiment għax twieled Malta u mhux f'wieħed mill-24 pajjiż ieħor tal-UE.
3) Li fil-parlament ikun hemm nies għaqlin, u mhux bilfors rapprżentanti ta' żewġ tribujiet.
4) Li l-awtoritajiet jindunaw - fl-aħħar - li dal-pajjiż għandu kultura, u li jindunaw li qabel kulħadd iridu jkunu huma li jieħdu ħsiebha.
5) Li l-awtoritajiet jammettu li fiżikament sfreġjaw lil dal-pajjiż u li jridu joqogħdu attenti li ma jkomplux jisfrakassawh.
6) Li l-awtoritajiet jindunaw li m'għadniex ngħixu fis-snin tmenin: li għandna moħħ (bħalma kellna dakinhar, wara kollox) u mhux kulħadd lest jibqa' jibla' kollox, jistenna li tasal l-elezzjoni biex forsi tiċċaqlaq xiħaġa. Li jindunaw li t-tokens m'għadniex nemmnu fihom.
7) Fuq kollox li 41 sena wara l-indipendenza, nibdew naħsbu fuq l-indipendenza tal-moħħ.
Mużika fl-isfond: Cream, We're Going Wrong ... bl-ebda innuendo politiku!

13.9.05

blobb (5)

Seta' Kien Ikbar, Seta' Kien Isbaħ
Fuq it-tabellina, Silvana Izzo Clarke kitbet li biex issir taf pajjiżek trid titbiegħed minnu. Hemm mod ieħor kif tista' ssir tafu mingħajr ma titbiegħed minnu: tgħix ma' xiħadd barrani. F'daqqa waħda dak li kien familjari jsir aljen, ir-ritratt ta' fuq l-iskrivanija wkoll jibda jidher differenti. Saħansitra x-xbieha tittawwallek minn ġol-mera xxidd wiċċ stramb li qatt ma tkun rajt qabel. U jkolli nistqarr li s-sensazzjoni hija waħda stramba u xi mindaqqiet skomda wkoll. Stramba kif tkun ilek tifli l-fili u f'daqqa waħda xiħadd jurik li dak li tkun flejt u xtarrejt ikun biss stampa li tista' titħassar faċilment.
Anki ċ-ċokon għandu l-misteri tiegħu.
Seta' kien ikbar ...
Domt ftit ma fhimt għala fl-istazzjonijiet tat-tren, jew fil-maġġoranza assoluta tagħhom, waħda mill-irkejjen l-aktar importanti hija l-kafetterija. Imbagħad bdejt ninnota kif ħafna vjaġġaturi, l-aktar dawk li jgħixu fil-pajjiż stess, joħorġu kolazzjon li jkunu xtraw mill-istazzjon; ġeneralment xi siegħa wara t-tluq. Tqajjem il-ġuħ id-distanza? Mhux żgur. Imma l-ħin iva.
Ħadd ma joħlom jixtri kolazzjon u joqgħod jieklu malli jitla' l-45 lejn il-Belt. Tkun għadek lanqas ħallejt it-tgeżwira li ma ssellimx lill-iljun tal-Furjana.
Seta' kien isbaħ ...
Ħalli ngħiduha kif inhi: tneħħi l-ġebel x'tista' tara aktar? Forsi l-belt kapitali: dik li għandha bieb mimli xquq misduda bis-siment iswed; jew dik mimlija karozzi pparkjati jagħtuk merħba; jew dik tal-lożor u l-qliezet ta' taħt minxurin fil-gallariji; jew dik taż-żwiemel jintnu jiġbdu l-karrozzini u jaħraw minn kulfejn jgħaddu? ... Jew tas-Sliema: dik mnejn timxi tlikki tlikki minħabba t-traffiku; jew fejn tifga bit-torrijiet ta' l-appartamenti bi prezz fenomenali, jew fejn darba kien hemm xalè u, bħall-famuż teatru tal-Belt, waqa' u baqa' ma qam qatt? ... Jew ngħidu aħna Marsaxlokk u Birżebbuġa: fejn tmur tgħum fil-kumpanija ta' dinosawri ta' l-azzar li jwerrċuk qabel ma tilħaq l-ilma? ... Jew forsi l-Imdina: dik li meta konna mmorru l-iskola kienu jgħidulna li jsejħulha Belt is-Skiet, u llum invażata turisti jgħajtu u jwerżqu qishom qatt ma marru mkien?
Mark Vella
Mimli ironija l-għażiż sieħbi Mark Vella. Biss biss Slimiż u jżomm mal-Furjana (miskin!). Kiteb bloggata b'titlu mimli ironija meta tieħdu fil-kuntest tal-bloggata ta' qabel: The Europids Destroy Ta' Qali. Madwar Ta' Qali min kissru?
Sentejn ilu
Tgedwid deher fuq ix-xibka għall-ewwel darba bħal-lum sentejn.

12.9.05

Saħħa, Serg!

ARIA DI NEVE

Sopra le nuvole c’è il sereno
Ma il nostro amore
Non appartiene al cielo
Noi siamo qui
Tra le cose di tutti i giorni
Di giorni e giorni grigi
Aria di neve sul tuo viso
Le mie parole
Sono parole amare
Senza motivo
Prima o poi tra le nostre mani
Più niente resterà
E’ una vita impossibile
Questa vita insieme a te
Tu non ridi non piangi
Non parli più
E non sai dirmi perché
Lungo la strada del nostro amore
Ho già inventato
Mille parole nuove
Per i tuoi occhi
Più di mille canzoni nuove
Che tu non canti mai

Sergio Endrigo (15/06/1933-07/09/2005)

Mużika fl-isfond: Aria di Neve ta' Sergio Endrigo, interpretazzjoni Franco Battiato.

Nota: dil-bloggata kellha titla' qabel imma kelli problemi bil-blogger.

3.9.05

Blobb (4)

Katrina
Qattajna ġimgħa nduru t-Toskana. Għal ġimgħa nsejt id-dinja tiegħi - dik ċkejkna u l-oħra kbira - u ntlift intiegħem it-togħma tal-Medjuevu, ir-Rinaxximent u l-Vino Santo Fjorentin. L-unika referenza għas-seklu għoxrin sibtha f'Lucca u fit-Torre di Lago Puccini, imbagħad f'Bologna. Il-bqija nsejt kollox. B'Katrina smajt propju dalgħodu, meta xiħadd kien qed isemmi xiħaġa fuq ix-xarabank minn Bologna għal Venezja.

U tibda taħseb li għandek dmir sagrosant li tkun taf dak kollu li ġara fid-dinja. Suppost tkun ċittadin denju planetarju ... imbagħad illum il-ġurnata li hawn mitt elf sors u strument ta' l-informazzjoni. Minflok, smajt b'ċikka b'dak li ġara, u issa, il-ħdax ta' billejl għadni lanqas naf x'ġara eżatt. Għala ħakimni sens ta' ħtija?


Katrina - Katia
Katia Bertasi kellha 34 meta fit-2 ta' Awwissu 1980 kienet fl-istazzjon ferrovjarju ta'
Bologna - il-Belt il-Ħamra kif inhi magħrufa fost it-Taljani. Flimkien ma' 84 ruħ oħra spiċċat vittma ta' waħda mill-agħar straġi fl-era taċ-ċomb fl-Italja.

F'Bologna, minkejja s-sirġa tax-xemx, għadhom jiftakruha din l-istraġi. Fl-istazzjon ċentali għad hemm it-tifkira: il-lapida bl-ismijiet, l-arloġġ li ħasad il-ħin fl-10,25.

Int u dieħel Bologna, hemm jilqgħuk il-billboards ħomor jgħajtu tad-
DS. Hemm ukoll Via Stalingrad.
L-Eroj ta' Lucca
Ridna mmorru nżuru d-dar fejn twieled u trabba Giacomo Puccini. Mixja qasira mill-Porta San Pietro tieħdok għal Via di Poggio fejn suppost hemm din id-dar li saret mużew Puccinjan. Minflok id-dar, sibna folja triplaj:

Kont naħseb li d-dilettantiżmu, il-kafkafiżmu, u ċ-ċuċiżmu huma kwalitajiet iżolani. Issa kkonfermajt li l-faqar tassew jinsab kullimkien, imqar f'Lucca tal-Maestro.
Fuq it-Torre del Lago Puccini, għal 5 Euro, jeħduk rikba ta' siegħa fuq luzzu u jdawruk ftit mal-Lag ta' Massaciuccoli, fejn il-Maestro minn Lucca kien imur jispara għat-tjur minn fuq l-ispeedboat tiegħu. (Il-Maestro kellu speedboat u erbatax-il karozza.) Idoqqulek tejp bl-istorja tal-lag u informazzjoni interessanti dwar it-tjur u l-ħut tal-lag u mbagħad, għall-bqija tar-rikba, iħalluk tħares lejn l-ilma bil-melodiji l-aktar magħrufa ta' Puccini. Ma stajtx noqgħod nisma' wisq melodiji għax il-kaptan tal-luzzu qagħad jeqred miegħi dwar kemm sejjer ħażin it-turiżmu fit-Toskana. Forsi riedni nitħassru u nħallilu ftit perkaċċi mal-prezz, iżda ta' Malti li jien għidtlu li Malta wkoll għandha kriżi fil-qasam tat-turiżmu u allura l-but mhux daqstant mimli.
La Feltrinelli
Sagħtejn u nofs fil-ħanut ta' Feltrinelli f'Via Cavour, Firenze, waħħluni kont ta' 110,25 Euro. Nittama li ndum ħafna ma nerġa' nersaq 'l hemm.
Mużika fl-isfond: O Mio Babbino Caro, l-arja l-aktar magħrufa mill-opra Gianni Schicchi